Faciendo vida de país

 

D’ente les posibles traducciones que seríamos quién a escoyer pa mirar d’incorporar tolos matices de la espresión inglesa “country life” a la nuesa llingua, seique seya “vida de país” la más acondada de toes. Country Life nun significa sólo vida rural, ye daqué más. Ye muncho más.

Somos munchos los que cásique nacimos cola crisis económico, social y cultural que vien cebándose n’Asturies dende l’últimu cuartu’l sieglu XX, ensin tener entá mui claro au mos ta empobinando la mísere dinámica clientelar espardida alrodiu d’ella, xeneradora d’un escenariu enforma murniu qu’a bien de nós mos abulta dafecho escosu.

Dende equí, queremos espeyar cómo munchos conciudadanos de nueso, escueyen día tres día, callandino, enfrentar los perfondos cambios sociales y económicos arreyaos a esa crisis dende una perspeutiva nueva dafecho. Queremos facer por amosar y alendar esa nueva vida de país que surde n’Asturies nestos tiempos, encarándolos con imaxinación y valentía. Una vida rica en valores culturales y humanos, abierta al mundu y venceyada de forma decidío al nuesu entá bayurosu mediu natural. Una vida alloñada del estándar urbanu y uniformizador qu’impón el sistema. Una vida moderna que s’afita y evoluciona dende les formes tradicionales de la vida rural, encontándose na sencia la memoria d’un pueblu que foi y qu’entá nun quier dexar de ser.

Convidámosvos a vivir con nós, y d’otra forma, el presente y futuru d’esti país de nome plural, únicu y tamién máxicu: Asturies.

Afayáivos, esti ye’l vuestru llar.

 Asturies, tipos y paisaxes. Grabáu de Cuevas pa “La Ilustración Española y Americana”. 1880

Acerca de Sele

Sele B&B www.sele.com.es
Esta entrada fue publicada en Sin categoría. Guarda el enlace permanente.